இலங்கை ஒலிபரப்புக் கூட்டுத்தாபனத்தில் ஒருபிரிவாக செயற்பட்டு வருகின்ற முஸ்லிம் சேவை ஒலிபரப்பினை தடைசெய்யக்கோரி பொதுபல சேனா அமைப்பு, ஊடகத்துறை அமைச்சர் கெஹலிய ரம்புக்வெல்லவிடம் இன்று கோரிக்கை விடுத்துள்ளது.



இந்த முறைப்பாட்டை அந்த அமைப்பைச் சேர்ந்த பொதுச் செயலாளரான கலகொட அத்தே ஞானசார தேரர், கொழும்பிலுள்ள ஊடக அமைச்சிற்கு விரைந்து வழங்கியிருக்கின்றார்.

அதன் பின்னர் ஊடகங்களிடம் பேசிய அவர்,

வஹாப்வாத, இஹ்வான் இனவாதப் பிரிவு என பல்வேறு அடிப்படைவாத இஸ்லாமிய அமைப்புக்கள் இலங்கையிலும் செயற்பட்டு முஸ்லிம் மக்களை திசைதிருப்புவதாக நாங்கள் அடிக்கடி கூறிவந்தோம்.

ஆனாலும் அதனை பலரும் ஈஸ்டர் தாக்குதல் இடம்பெறும்வரை நம்பவில்லை. ஆனால் இன்று அந்த செயற்பாடுகள் அரச ஊடகங்களைப் பயன்படுத்தி இடம்பெறுகின்றன. அதனை அரசாங்கம் விரைந்து தடுக்க வேண்டும்.

அரசிலுள்ள சில அதிகாரிகள் முஸ்லிம் பிரிவுகளிலிருந்து பணம் உட்பட பல்வேறு இலஞ்சங்களைப் பெறுவதால் இதனை தடைசெய்ய முடியவில்லை.இனியும் அவ்வாறு இருக்கக்கூடாது. விரைந்து இந்த முஸ்லிம் ஒலிபரப்பினை தடைசெய்ய வேண்டும் என்று கூறினார்.

இது தொடர்பில் தான் பெயர் பட்டியல் ஒன்றை ஊடகத்துறை அமைச்சரிடம் வழங்கியுள்ளதாகவும், அவர்களை நீக்கிவிட்டு புதிய பணிப்பாளர் சபையை முஸ்லிம் சேவைக்கு நியமிக்குமாறும் ஞானசார தேரர் இதன்போது மேலும் கூறினார்.